د افغان خبریالانو خوندیتوب کمېټې رئیس د جوزجان د اطلاعات او فرهنګ له رئیس مولوي سیف الدین معتصم سره د خبریالانو د کار پر وړاندې په پرتو ننګونو، اطلاعاتو ته په لاسرسي او د خبریالانو د خوندیتوب په اړه ناسته وکړه.
په دې ناسته کې د خبریالانو خوندیتوب کمېټې رئیس عبدالقدیم ویاړ اطلاعاتو ته د خبریالانو پر وخت لاسرسي ټینګار وکړ او غوښتنه یې وکړه چې د دې ولایت خبریالانو ته دې د لا ښه کار زمینه برابره شي.
د جوزجان ولایت د اطلاعات او فرهنګ رئیس مولوي سیف الدین معتصم د افغان خبریالانو خوندیتوب کمېټې له فعالیتونو خوښي وښوده، مننه یې وکړه او د خبریالانو او رسنیو په رول یې ټینګار وکړ. نوموړي همدا راز ډاډ ورکړ، چې په یاد ولایت کې به د خبریالانو ستونزو ته رسیدګي وکړي.
افغان خبریالانو خوندیتوب کمېټه د رسنیو د ستونزو د هوارې او خبریالانو ته د خوندي چاپېریال د رامنځ ته کولو په برخه کې په دوامداره توګه هڅې کوي.
