افغان خبریالانو خوندیتوب کمېټې په خوست ولایت کې له ځايي خبریالانو او د رسنیو له مسوولینو سره د هغوی د ستونزو، وړاندیزونو او اندېښنو د اورېدو په پار مشورتی ناسته وکړه.
په دغه ناسته کې د افغان خبریالانو خوندیتوب کمېټې مسوولینو، د سیمه ييزو رسنيو مسوولینو، په دغه ولايت کې فعالو خبریالانو او ځايي حکومتي چارواکو برخه اخېستې وه.
په غونډه کې اطلاعاتو ته د لاسرسي، د رسنيو د برېښنا لوړ لګښت، د فریکونسي د جواز لګښت، د ځينو رسنيو له لوري خپلو کار کوونکو او خبریالانو ته د کاري قراردادونو نه ورکړه او د خبریالانو د مهارتونو او ظرفيت لوړونې په موخه د ښوونيزو پروګرامونو کمښت په دغه ولايت کې د خبریالانو پر وړاندې لویې ستونزې وبلل شوې.
د افغان خبریالانو خوندیتوب کمېټې مسوول جميل وقار د خبریالانو او رسنيو د کار د ستایلو ترڅنګ وويل، چې افغان خبریالانو خوندیتوب کمېټه د خبریالانو او رسنیو پر وړاندې د پرتو ستونزو د حل لپاره تل هڅه کوي.
هغه همدغه راز وويل، دا غونډه مرسته کوي چې د شته ستونزو، غوښتنو او واقعيتونو څخه په کره ډول خبر شو او د همدې ځان خبروني له مخې، خپل راتلونکي پروګرامونه جوړ او د رسنيز کار پر وړاندې پرتې ستونزې حل کړو.
افغان خبریالانو خوندیتوب کمېټه د خبریالانو د کار پر وړاندې د پرتو ستونزو د حل او دوی ته د خوندي کاري چاپيریال د رامنځته کولو لپاره تل هڅه کوي.
