افغان خبریالانو خوندیتوب کمېټې د جنوب زون د خبریالانو او رسنیو د ستونزو، وړاندیزونو او اندېښنو د اورېدو په پار د کندهار، هلمند، روزګان او زابل ولایتونو له ځايي خبریالانو او د رسنیو له مسوولینو سره د همغږۍ او مشورې ناسته وکړه.
په یاده ناسته کې د افغان خبریالانو خوندیتوب کمېټې مسوولینو، د سیمه ييزو رسنيو مدیرانو، په دغه ولايت کې فعالو خبریالانو او ځايي حکومتي چارواکو برخه اخیستې وه.
په ناسته کې اطلاعاتو ته د لاسرسي، په مربوطه ولایتونو او زون کې د رسنیو د جوازونو نه تمدید، د رسنیو اقتصادي ستونزې، د رسنيو د برېښنا لوړ لګښت، د فریکونسي د جواز لګښت او د خبریالانو د مهارتونو او ظرفيت لوړونې په موخه د ښوونيزو پروګرامونو کمښت په دغه ولايت کې د خبریالانو پر وړاندې لویې ستونزې وبلل شوې.
د افغان خبریالانو خوندیتوب کمېټې مسوول جميل وقار د خبریالانو او رسنيو د کار د ستایلو ترڅنګ وويل، چې افغان خبریالانو خوندیتوب کمېټه د خبریالانو او رسنیو پر وړاندې د پرتو ستونزو د حل لپاره هڅه کوي، ترڅو د رسنیز کار لپاره لا ښه زمینه برابره شي.
افغان خبریالانو خوندیتوب کمېټه د خبریالانو د کار پر وړاندې د پرتو ستونزو د حل او دوی ته د خوندي کاري چاپيریال د رامنځته کولو لپاره تل هڅه کوي.
