د اسلامي امارت د حکومت د رسنيو د مرکز رييس انعام الله سمنګاني د افغان خبريالانو خونديتوب کمېټې څخه ليدنه وکړه.
په دغه ليدنه کې اطلاعاتو ته د خبريالانو او په ځانګړي توګه د ښځينه خبريالانو د لاسرسي ستونزو، د رسنيو اقتصادي ستونزو، د حکومت او رسنيو ترمنځ د همغږۍ او د خبريالانو او رسنيو د نورو ستونزو په اړه خبرې اترې وشوې.
د حکومت د رسنيو د مرکز مشر ښاغلي سمنګاني ډاډ ورکړ چې سرپرست حکومت د خبريالانو او رسنيو د کار پر وړاندې د ستونزو د حل او په ځانګړي توګه د اقتصادي ستونزو د حل په برخه کې هلې ځلې کوي.
د افغان خبريالانو خونديتوب کمېټه تل هڅه کوي چې د خبريالانو او حکومت ترمنځ ښه همغږي او خوندي کاري چاپيريال رامنځته شي.
