د افغان خبريالانو خونديتوب کمېټې سرپرست د بغلان له امنيه قوماندان سره د خبريالانو د ستونزو د حل، اطلاعاتو ته د لاسرسي او د حکومتي مسوولينو او رسنيو ترمنځ د همغږۍ زياتوالي په اړه ناسته وکړه.
د بغلان له امنيه قوماندان مولوي جان محمد حمزه سره په لیدنه کې د کمېټې سرپرست عبدالقديم وياړ ټينګار وکړ چې بايد رسنيو ته د ازاد فعاليت زمينه برابره شي او ترڅنګ يې د ځایي حکومتي مسوولينو او رسنيو ترمنځ د همغږۍ زياتوالي، اطلاعاتو ته د خبريالانو د لاسرسي او يو شمېر نورو ستونزو په اړه خبرې وکړې.
د بغلان امنيه قوماندان هم خبريالانو او رسنيو ته د اطلاعاتو لاسرسي برخه کې د همکارۍ ډاډ ورکړ او ټينګار یې وکړ چې رسنۍ بايد په خپلواکه توګه نشرات وکړي.
د افغان خبریالانو خوندیتوب کمېټه تل هڅه کوي چې د حکومت او رسنيو ترمنځ همغږي پياوړي کړي تر څو خبريالانو ته خوندي کاري چاپیریال رامنځته شي.
